اسلام آباد۔12جون(اے پی پی) روس توں درآمد کیتے ونڄݨ آلے خام تیل دی ٹیسٹنگ دا عمل24 گھنٹے اچ مکمل تھی ویسی ،روسی خام تیل توں پاکستان کوں توانائی دی لوڑھ پوری کرݨ تے زرمبادلہ دے ذخائر کوں مستحکم بݨاوݨ اچ مدد ملسی ۔ وزارت پٹرولیم دے ذرائع موجب روس توں خام تیل موخر ادائیگی دی سہولت تےعالمی مارکیٹ توں گھٹ قیمت تے مل ڳھدا ویندا پئے ۔ ملک دی وݙی ریفائنریز پاکستان ریفائنری لمیٹڈ، نیشنل ریفائنری لمیٹڈ اتے پاک عرب ریفائنری لمیٹڈ درآمد ی خام تیل کوں ریفائن کرݨ اچ دلچسپی ظاہر کیتی اے ۔ خام تیل دی ریفائنگ دی رپورٹ وزارت پٹرولیم کوں ݙتی ویسی جیں اچ خام تیل دے معیار ،ترسیل دی لاڳت، کمرشل طور تے ایندے قابل استعمال ہووݨ، پٹرول ، ڈیزل ، مٹی دے تیل ، فرنس آئل ، تارکول تے جے پی ایٹ دی مقدار دا پتہ لاتا ویسی ۔ رپورٹ دی منظوری دے بعد حکومت توں حکومت تئیں دی سطح تے خام تیل دی درآمد کیتے معاہدے دا امکان اے۔ ھک لکھ ٹن روسی خام تیل گھن تے آزمائشی طور تے پہلا بحری جہاز 7 جون کوں اومان دی بندر گاہ داقم پڄا ہئی جتھوں 45ہزار ٹن توں ودھ خام تیل ھک چھوٹے بحری جہاز دے ذریعے کراچی پڄایا ڳئے ۔ ایہو بحری جہاز بقایا خام تیل اومان دی بندرگاہ توں 20 جون تئیں کراچی پورٹ پڄیسی ۔ پاکستان اپݨی ضرورت دا 70 فیصد خام تیل درآمد کریندے جیڑھا جو پاکستان ریفائنری لمیٹڈ ، نیشنل ریفائنری لمیٹڈ ، پاک عرب ریفائنری لمیٹڈ اتے بائیکو پٹرولیم ریفائن کریندن ۔باقی 30 فیصد تیل دی لوڑھ ملکی پیداوار توں پوری کیتی ویندی اے۔
