اسلام آباد۔17اپریل (اے پی پی) صدر مملکت ڈاکٹر عارف علوی ملک کوں صحت اتے تعلیم دے شعبیاں اچ درپیش چیلنجز نال نبڑݨ کیتے جامع حکمت عملی ٻݨاوݨ دی لوڑھ تے زور ݙیندیں ہوئیں آکھیا جو سکول ونجݨ دی عمر دے ترائے کروڑ توں ودھ ٻال سکولاں توں ٻاہر ہن، اے تعداد تشویشناک اے جئیں کیتے تخلیقی حل سوچݨ دی لوڑھ اے۔ انہاں ٻالاں کوں تعلیم ݙیوݨ ہک واقعی وݙا چیلنج اے جئیں نال صرف روایتی طریقے نال حل نی کیتا ونڄ سڳدا بلکہ ایں کیتے ڈیجیٹل اتے آن لائن سکھݨ دے طریقیاں کوں استعمال کیتا ونڄے۔ اے ڳالھیں انہاں یونیسیف ولوں کیتے ڳے اقدامات بارے بریفنگ اجلاس دی صدارت کریندیں ہوئیں آکھی۔ یونیسیف دے کنٹری ریپریزنٹیٹو عبداللہ عبدالعزیز فاضل اجلاس کوں پاکستان اچ صحت اتے تعلیم دے شعبیاں اچ یونیسیف دے کردار اتے کامیابیاں بارے ݙسیا۔ سنوار کوں ایوان صدر اچ تھیوݨ آلی بریفنگ اچ چیف پولیو یونیسیف ہامش ینگ، چیف ایجوکیشن ایلن وان کالمتھائوٹ، چیف واش ہیلی گاشا اتے ٻے شریک تھیے۔
