اسلام آباد۔17ستمبر(اے پی پی) وفاقی وزیر قانون و انصاف، سینیٹر اعظم نذیر تارڑ آکھیے جو جھیڑیں دے متبادل حل (اے ڈی آر) دا نظام انصاف پاکستان اچ زیر التواء مقدمیں دے بحران دا ساریں توں مؤثر حل اے۔ انہاں اے ڳالھ اے ڈی آر بارے تربیت دے ݙوجھے ݙینھ شرکاء توں خطاب اچ آکھی ۔ انہاں حکومت دے جھیڑیں دے حل بارے متبادل نظامِ انصاف (اے ڈی آر) کوں ودھارا ݙیوݨ دا عزم کریندے علامہ محمد اقبالؒ دا اے شعر پڑھیا:جہانِ تازہ کی افکارِ تازہ سے ہے نمود، کہ سنگ و خشت سے ہوتے نہیں جہاں پیدا” یعنی نویں دنیا تازہ خیالات اتے نظریات توں ابھردی اے اتے نوی دنیا محض سلھاں یا پتھروں توں نی بݨدیاں ۔ وفاقی وزیر وضاحت کریندے آکھیے اے ڈی آر اسی جدت دی عکاسی کریندے، جیڑھا وقتی ، مؤثر اتے خوشگوار طریقہ کار ݙیندے تاں جو جھیڑیں کوں حل کیتا ونڄ سڳے ، عدالتاں تے ٻوجھ گھٹ تھیوے تے عوام دا عدالتی نظام تے اعتماد مزید تکڑا تھیوے ۔انہاں ایں ڳالھ کوں وی اجاگر کیتے جو تربیت اچ متنوع شرکاء شامل ہن، جنھاں اچ ارکان پارلیمنٹ، ہائی کورٹ دے ججز، وفاقی سیکریٹریز، مختلف وزارتاں اتے ڈویژنز دے سول و فوجی افسراں، قانونی ماہرین اتے کاروباری رہنما شامل ہن۔ انہاں زور ݙتا جو اے تنوع سارے فریقین دی طرفوں مصالحت اتے جھیڑیں دے متبادل حل دے ٻئے اے ڈی آر طریقہ کار اپناوݨ دی واضح خواہش دااظہار ہن۔وزیر پروگرام دی قیادت اتے عزم دی تعریف کریندے پراجیکٹ ڈائریکٹر ایمیک عائشہ رسول، رجسٹرار ایمیک احسان اللہ خان اتے ایمیک دی ٹیم کوں تربیت دے شاندار انتظام تے خراجِ تحسین پیش کیتا۔ انہاں بین الاقوامی ماہرین رحیم شمجی، محترمہ سارہ تارڑ اتے ڈاکٹر خالد چوہدری دا وی شکریہ ادا کیتا جو انہاں شرکاء کوں عالمی معیار دی تربیت ݙتی۔انہاں زور ݙتا جو ایمیک ملک اچ منعقدہ اے تے ٻئے تربیتی پروگراماں دے ذریعے مصالحت سانڳے ھک جامع نظام تشکیل ݙیندا پئے۔ انہاں پارلیمنٹرینز، ججز اتے عدالتی نظام دے سارے فریقین توں اپیل کیتی جو او مصالحت اتے جھیڑےدے متبادل حل بارے ٻئے طریقہ کار کوں ودھارا ݙیوݨ اچ بھرپور کردار ادا کرن تاں جو مقدمیں دے وݙے پیمانے تے ٻوجھ کوں موثر انداز اچ گھٹ کیتا ونڄ سڳے۔
.jpg)
.jpg)
