انقرہ ۔5جون (اے پی پی) وزیر اعظم محمد شہباز شریف آکھیاجو آئی ایم ایف دی پیشگی شرطاں پوری کر ݙتن، امید اے جو ایں مہینے چھیکڑی معاہدہ تھی ویسی۔ اڄوکی حکومت پاکستان دی عوام اتے بردارانہ اتے دوست ملکاں دی مدد نال بہترین انداز اچ چیلنجز نال نبڑدی پی اے۔ عمران خان کوں سنگین بدعنوانی اتے غیر قانونی لین دین دے الزامات دا سامݨا اے جئیں کوں قانون موجب نبڑسوں، پاکستان اتے ترکیہ مستقبل قریب اچ بائیو گیس، شمسی توانائی اتے پن بجلی جیھے شعبیاں تے توجہ ݙے تے تجارت کوں ودھاوݨ اتے آپسی ترقی وکں ودھیسن۔ اے ڳالھیں انہاں ترکیہ دے صدر رجب طیب اردوان دی تقریب حلف برداری اچ شرکت دے موقع تے ترکیہ دے قومی خبر رساں ادارہ اناطولیہ کوں خصوصی انٹرویو ݙیندیں ہوئیں آکھی۔ وزیراعظم محمد شہباز شریف آکھیا جو اساں ہݨ وی ٻہوں پر امید ہیسے جو آئی ایم ایف پروگرام عمل اچ امسی، آئی ایم ایف ولوں اساݙا 9واں جائزہ ساری شرطاں نال ملدے اتے امید اے جو اساکوں ایں مہینے چنڳی خبر ملسی۔ آئی ایم ایف نال مذاکرات ناکام تھیوݨ دی صورت اچ ہنگامی منصوبے بارے شہباز شریف پاکستانی قوم دے عزم اتے استقامت تے زور ݙتا، پاکستان دی عوام ماضی اچ چیلنجز دا سامݨا کیتے اتے اگر لوڑھ پی تاں اساں کمر کس ڳھنسوں اتے کھڑسوں۔ انہاں آکھیا جو جݙاں حکومت اپریل 2022ء اچ عمران خان کوں عدم اعتماد دے ووٹ نال اقتدار توں ہٹا تے ٻݨی ایں ویلھے پاکستان ٻہوں اوکھ اچ اے، اے مسئلہ گزریل حکومت دی پالیسیاں، اگست اچ تھیوݨ آلے چھل اتے مہانگ دا باعث اے۔ انہاں آکھیا جو پاکستان اپریل 2022 اچ دیوالیہ تھیوݨ دے نیڑے ہئی کیونجو اوں ویلھے دی حکومت آئی ایم ایف معاہدے دی خلاف ورزی کیتی ہئی اتے معیشت تباہی دا شکار ہئی۔ وزیر اعظم آکھیا جو عمران خان اپݨی گرفتاری دی صورت اچ ہک مد توں اپݨے لوکاں کوں پرتشدد ردعمل ݙیوݨ کیتے ذہنی طور تیار کریندا پیا ہئی، اے اوندے ٹھڳاں دا ہک گروپ اے، انہاں ریاست پاکستان دے خلاف ٻہوں سنگین کم دی منصوبہ بندی کیتی، اوں اپݨے لوکاں کوں اکسایا، ایندے کہیں شک و شبہ توں ہٹ تے ثبوت موجود ہن۔ عمران خان دے حامیاں کوں عمارتاں ساڑݨ، اداریاں تے حملہ کرݨ اتے شہیداں دی یادگاراں دے بے حرمتی کرݨ دی ہدایت ݙتی ڳی ہئی، جنہاں لوکاں شہری تنصیبات تے حملہ کیتے اوندے خلاف سویلین قانون دے تحت مقدمہ چلایا ویسی اتے جنہاں فوجی تنصیبات تے حملہ کیتے اتے اداریاں دے بے حرمتی کیتی انہاں دے خلاف آرمی ایکٹ دے تحت مقدمہ چلایا ویسی۔ شہباز شریف ترکیہ دی عوام کوں صدر رجب طیب اردوان دے ولا صدر ٻݨݨ تے مبارخ ݙتی۔ انہاں آکھیا جو میں اپݨے بھرا صدر رجب طیب اردوان نال رل تے کم کریساں۔
