اسلام آباد۔20اکتوبر(اے پی پی) وزارت ریلوے دی طرفوں قومی اسمبلی کوں ݙسایا ڳئے جو ملک دے چارے صوبیں اچ ریلوے دی 9986 ایکڑ زمین تے قبضہ اے، گزریل پنج سالاں اچ 952 ایکڑ زمین واگزار کرائی ڳئی اے، باقی زمیناں تے قبضے واگزار کراوݨ کیتے کارروائی جاری اے۔ قومی اسمبلی اچ سوالاں دے وقفے ویلھے طاہرہ اورنگزیب دے سوال دے جواب اچ وزارت ریلوے دی طرفوں تحریری جواب اچ ݙسایا ڳئے جو ریلوے دی پورے ملک اچ 9986 ایکڑ زمیناں تے لوکاں دا قبضہ اے جتھاں پنجاب اچ 3287 ایکڑ، خیبرپختونخوا اچ 832 ایکڑ، سندھ اچ 5180 ایکڑ اتے بلوچستان اچ 687 ایکڑ زمیناں شامل ہن۔ سپریم کورٹ دے حکم دی روشنی اچ پورے ریلوے نیٹ ورک اچ ریلوے دے زیر قبضہ زمین چھڑاوݨ کیتے تجاوزات دے خلاف آپریشن دا آغاز کیتا ڳئے تے قابضین توں ریلوے دی زمین چھڑاوݨ کیتے سارے ڈویژنل سپرنٹنڈنٹس کوں کارروائی دا حکم ݙتا ڳیا ۔ انسداد تجاوزات دے ترائے مہینے دے شیڈول مشترکہ کارروائی دے حکم دے مطابق تیار کیتے ویندن تے سارے متعلقین کوں بھیجے ویندن ۔ گزریل پنج سالاں اچ تجاوزات دے خلاف مختلف آپریشنز اچ 9603 ملین روپے توں ودھ مالیت دی 952.13 ایکڑ ریلوے زمین واگزار کرائی ڳئی اے۔ طاہرہ اورنگزیب دے ضمنی سوال دے جواب اچ پارلیمانی سیکرٹری کرن عمران ڈار آکھیے جو گزریل پنج سالاں اچ گھٹ زمین چھڑائی ڳئی اے مگر حالی ھک جاری عمل اے ۔ ریلوے ٻئے محکمے تے انتظامیہ نال رل تے باقی زمیناں و چھڑویسی ۔
